‘ജനങ്ങളുടെ വിശ്വാസം നഷ്ടപ്പെട്ടാൽ പിന്നെ തുടരുന്നതിൽ കാര്യമില്ല ‘: രാജി പ്രഖ്യാപിച്ച് ജപ്പാൻ പ്രധാനമന്ത്രി

സിയോൾ : രാജിപ്രഖ്യാപിച്ച് ജപ്പാൻ പ്രധാനമന്ത്രി ഫ്യൂമിയോ കിഷിദ. സെപ്റ്റംബറിൽ സ്ഥാനം ഒഴിയുമെന്ന് അദ്ദേഹം വ്യക്തമാക്കി. ഒപ്പം പുതിയ പ്രധാനമന്ത്രിയെ തീരുമാനിക്കാൻ കിഷിദ ലിബറൽ ഡെമോക്രാറ്റിക് പാർട്ടിയോട് (എൽഡിപി) ആവശ്യപ്പെട്ടതായി എൻഎച്ച്കെ ഉൾപ്പെടെയുള്ള ജാപ്പനീസ് മാധ്യമങ്ങൾ റിപ്പോർട്ട് ചെയ്തു. ഭരണകക്ഷിയായ ലിബറൽ ഡെമോക്രാറ്റിക് പാർട്ടിയുടെയോ എൽഡിപിയുടെയോ പ്രസിഡൻ്റായി അടുത്ത മാസം വീണ്ടും തിരഞ്ഞെടുപ്പിൽ മത്സരിക്കില്ലെന്ന് അദ്ദേഹം പത്രസമ്മേളനത്തിൽ പറഞ്ഞു.

ജനങ്ങളുടെ വിശ്വാസം നഷ്ടപ്പെട്ടാൽ പിന്നെ രാഷ്ട്രീയത്തിൽ തുടരുന്നതിൽ കാര്യമില്ലെന്ന് അദ്ദേഹം വ്യക്തമാക്കി. ജനങ്ങളെ ഓർത്താണ് ഈ തീരുമാനം എടുത്തതെന്നും അദ്ദേഹം പറഞ്ഞു. എൽഡിപി പ്രസിഡൻ്റായ കിഷിദയുടെ കാലാവധി സെപ്തംബറിൽ അവസാനിക്കും. പാർട്ടി ഒരു പുതിയ നേതാവിനെ തെരഞ്ഞെടുക്കും, എൽഡിപിക്ക് അധോസഭയിൽ ഭൂരിപക്ഷമുള്ള രാജ്യത്തിൻ്റെ പാർലമെൻ്റ് പുതിയ നേതാവിനെ പ്രധാനമന്ത്രിയായി തിരഞ്ഞെടുക്കും.കിഷിദയുടെ അംഗീകാര റേറ്റിംഗ് 25% ആയി കുറഞ്ഞു, എന്നാൽ താൻ ഓഫീസിൽ തുടരുമെന്ന് അദ്ദേഹം തറപ്പിച്ചു പറഞ്ഞു.

ഫ്യൂമിയോ കിഷിദ ജപ്പാൻ പ്രധാനമന്ത്രിയായത് 2021ലാണ്. ആയിരത്തിലധികം ദിവസങ്ങൾ കിഷിദ ഓഫീസിൽ ചെലവഴിച്ചു, രണ്ടാം ലോക മഹായുദ്ധത്തിനു ശേഷം ഏറ്റവും കൂടുതൽ കാലം ജപ്പാൻ്റെ എട്ടാമത്തെ പ്രധാനമന്ത്രിയായി.വിലക്കയറ്റവും അഴിമതി ആരോപണങ്ങളും മൂലം അദ്ദേഹത്തിന്‍റെ ജനപ്രീതി ഇടിഞ്ഞു .

ജീവിത ചെലവിലുണ്ടായ വർദ്ധന ഉൾപ്പെടെ ജനങ്ങളെ നേരിട്ട് ബാധിക്കുന്ന പ്രശ്നങ്ങൾ പുതിയ പ്രധാനമന്ത്രിക്ക് മുന്നിലുണ്ട്. അതെ സമയം, കൊവിഡ് വേളയിൽ കിഷിദ പ്രഖ്യാപിച്ച സാമ്പത്തിക പാക്കേജുകൾ ജനങ്ങൾക്ക് ഏറെ ആശ്വാസകരമായിരുന്നു. പിന്നീട് ബാങ്ക് ഓഫ് ജപ്പാൻ അപ്രതീക്ഷിതമായി പലിശ നിരക്ക് ഉയർത്തിയത് സ്റ്റോക്ക് മാർക്കറ്റിൽ അസ്ഥിരതയ്ക്ക് കാരണമായി. യെൻ മൂല്യം കുത്തനെ ഇടിയുകയും ചെയ്തു. യൂണിഫിക്കേഷൻ ചർച്ചും എൽഡിപിയും തമ്മിലുള്ള ബന്ധവും എൽഡിപിയുടെ രേഖകളിലില്ലാത്ത ധനസമാഹരണവും ജപ്പാനിൽ വിവാദമായി. ഇതോടൊപ്പം വർദ്ധിച്ചുവരുന്ന ജീവിത ചെലവുകൾക്ക് അനുസരിച്ച് വേതനം ഉയർത്താതിരുന്നതും ജനങ്ങളിൽ അതൃപ്തി ഉടലെടുക്കാൻ കാരണമായി.

അതെ സമയം , പ്രധാനമന്ത്രി കിഷിദയുടെ ധീരമായ നേതൃത്വം എന്നും സ്മരിക്കപ്പെടുമെന്നും അദ്ദേഹം നല്ല സുഹൃത്താണെന്നും യുഎസ് പ്രസിഡന്‍റ് ജോ ബൈഡൻ പ്രസ്താവനയിൽ പറഞ്ഞു. കിഷിദയ്ക്ക് ശേഷം ആര് പ്രധാനമന്ത്രിയായാലും ജപ്പാനുമായുള്ള സഹകരണവും പങ്കാളിത്തവും യുഎസ് തുടരുമെന്ന് സ്റ്റേറ്റ് ഡിപ്പാർട്ട്‌മെന്‍റ് വക്താവ് വേദാന്ത് പട്ടേൽ വ്യക്തമാക്കി.

കിഷിദയ്ക്ക് ശേഷം മുൻ പ്രതിരോധ മന്ത്രി ഷിഗെരു ഇഷിബ പ്രധാനമന്ത്രിയായേക്കുമെന്നാണ് റിപ്പോർട്ട് . മതിയായ പിന്തുണ ലഭിച്ചാൽ തന്‍റെ കടമ നിറവേറ്റാമെന്ന് അദ്ദേഹം പറഞ്ഞതായി ജാപ്പനീസ് മാധ്യമങ്ങൾ റിപ്പോർട്ട് ചെയ്തു. 2025ൽ പൊതുതെരഞ്ഞെടുപ്പ് നടക്കാനിരിക്കെ നഷ്ടമായ ജനപ്രീതി തിരിച്ചുപിടിക്കാനാണ് എൽഡിപി ശ്രമിക്കുന്നത് .

English Summary:   Japan’s Prime Minister Fumio Kishida announced his resignation in September